Klofanmaks

Preparat haqida

KLOFANMAX

TIBBIYOTDA QO‘LLANILISHIGA DOIR YO‘RIQNOMA

Preparatning savdo nomi: KLOFANMAX

Dori shakli: vaginal va rektal suppozitoriylar

Tarkibi

Bitta suppozitoriy tarkibida:

·        Faol moddalar: dorixona moychechagi gullari ekstrakti — 0,05; kalendula ekstrakti — 0,05; yong‘oqning quyuq ekstrakti — 0,1; chakanda moyi — 0,01.

Suppozitoriylar uchun asos: qattiq yog‘ (Vitepsol, H15/W35 markasi; Supposir, NA15/NAS50 markasi yoki gidroyog‘ (kulinar, fritür) — 60 q.; parafin — 20 q.; kakao moyi — 30 q.).

Ta’rifi

Oqdan to‘q sariq ranggacha bo‘lgan, torpedasimon shakldagi suppozitoriylar.

Farmakoterapevtik guruhi

Asosan ginekologiyada qo‘llaniladigan vosita.

Farmakologik xususiyatlari

Dorixona moychechagi (Chamomilla recutita L., sinonimi Matricaria chamomilla L.) tarkibida xamazulen saqlovchi 0,2–0,8% efir moyi mavjud. Bundan tashqari, terpen, seskviterpen, kadinen, farnezen, seskviterpen spirti bisabolol, kapril va izovalerian kislotalari mavjud. Yallig‘lanishga qarshi, qon to‘xtatuvchi, antiseptik, kuchsiz burishtiruvchi, og‘riq qoldiruvchi, tinchlantiruvchi, tutqanoqqa qarshi, ter haydovchi va o‘t haydovchi ta’sir ko‘rsatadi. Moychechak efir moyi dezinfeksiyalovchi va ter haydovchi ta’sirga ega bo‘lib, og‘riqni kamaytiradi, yallig‘lanish jarayonlarini susaytiradi va buzilgan oshqozon-ichak trakti faoliyatini me’yorlashtiradi. Moychechak preparatlari eksperimental yaralarda epiteliy regeneratsiyasi jarayonlarini tezlashtiradi va yallig‘lanish rivojlanishini sekinlashtiradi.

Kalendula gullari ekstrakti (Calendula officinalis flower extract) ko‘plab foydali xususiyatlarga ega. Uning tarkibida vitamin A hosil bo‘lishi uchun zarur pigmentlar — karotinoidlar; tuzilishi jihatidan xolesteringa o‘xshash va uning o‘rniga so‘rilib, qondagi xolesterin miqdorini kamaytirishga yordam beruvchi spirtlar — sterinlar mavjud. Kalendula gullari ekstrakti olean kislota glikozidlari va boshqa triterpenoidlarning manbai bo‘lib, kuchli yallig‘lanishga qarshi ta’sir ko‘rsatadi. Tarkibidagi flavonoidlar silliq mushaklar spazmini kamaytirishga yordam beradi; shuningdek, efir moylari va kumarinlar mavjud. Kalendula yumshatuvchi (emollient), tinchlantiruvchi va yallig‘lanishga qarshi ta’sirga ega. Davolash maqsadida antiseptik, yallig‘lanishga qarshi va yara bitkazuvchi vosita sifatida qo‘llaniladi.

Yong‘oq (Juglans regia, Juglandaceae oilasi) qimmatli dorivor o‘simlik bo‘lib, tarkibida oqsillar, yog‘lar va biologik faol moddalarni saqlaydi. Uning tarkibida organik va fenolkarbon kislotalar, flavonoidlar, ko‘p miqdorda askorbin kislotasi (2% gacha), vitaminlar, karotinoidlar, xinonlar, taninlar va mineral moddalar mavjud. Flavonoidlar o‘smalarga qarshi faollikka, shuningdek antiviral va antimikrob ta’sirga ega bo‘lib, gemorroy, proktit va boshqa proktologik kasalliklarni davolashda ahamiyatlidir.

Chakanda moyi (Oleum Hippopheae) teri va shilliq qavatlardagi reparativ jarayonlarni rag‘batlantiradi, zararlangan to‘qimalarning bitishini tezlashtiradi va yallig‘lanishga qarshi ta’sir ko‘rsatadi. Antioksidant va sitoprotektor ta’sirga ega: yog‘da eruvchi bioantioksidantlar hisobiga erkin radikalli jarayonlar jadalligini kamaytiradi hamda hujayra va hujayra ichki membranalarini zararlanishdan himoya qiladi.

Qo‘llanilishi

KLOFANMAX shamchalari ayollarning ayrim kasalliklarini davolash uchun tavsiya etiladi: qin va oraliqning yallig‘lanishli, noinfeksion kasalliklari; jinsiy yo‘l bilan yuqadigan infeksion kasalliklar, jumladan bakterial vaginoz, kandidoz va trixomoniaz. Menopauza davrida atrofik kolpit va qin quruqligida samarali. Endometrit, endoservitsit va salpingooforitni davolashda kompleks terapiya tarkibida qo‘llaniladi. KLOFANMAX bachadon bo‘yni eroziyasini kuydirish muolajasidan keyin to‘qimalarning tiklanishini tezlashtiradi. U uretrit yoki sistit kabi siydik chiqarish yo‘llari kasalliklarida ham samarali. KLOFANMAX qinning tabiiy shilliq qavatini tiklashga yordam beradi.

Qo‘llash usuli va dozalari

Vaginal: gigiyenik muolajalardan so‘ng kuniga 1–2 mahal 1 suppozitoriydan.

Rektal: ichak o‘z-o‘zidan bo‘shaganidan yoki tozalovchi huqnadan so‘ng kuniga 1–2 mahal 1 suppozitoriydan. Suppozitoriy blister uyachasidan chiqarilgach, to‘g‘ri ichakka chuqur kiritiladi. Kiritilgandan so‘ng bemorga 30–40 daqiqa yotib turish tavsiya etiladi.

Davolash davomiyligi 10–14 kun. Zarurat bo‘lganda davolash kursi 4–6 haftadan so‘ng takrorlanishi mumkin.

Nojo‘ya ta’sirlari

Allergik reaksiyalar.

Qo‘llash mumkin bo‘lmagan holatlar

Preparat komponentlariga yuqori sezuvchanlik va 18 yoshgacha bo‘lgan davr.

Dorilarning o‘zaro ta’siri

Ma’lumotlar mavjud emas.

Maxsus ko‘rsatmalar

Preparatga ko‘nikib qolish yoki «bekor qilish sindromi» kuzatilmagan.

Dozani oshirib yuborilishi

Dozani oshirib yuborish holatlari tasvirlanmagan.

Chiqarilish shakli

Vaginal va rektal suppozitoriylar: 5 ta suppozitoriy polivinilxlorid plyonkadan yoki polietilen bilan laminatsiyalangan polivinilxlorid plyonkadan tayyorlangan kontur uyachali o‘ramda. Karton qutiga qo‘llash bo‘yicha yo‘riqnoma bilan birga 2 ta kontur uyachali o‘ram joylashtiriladi.

Saqlash sharoiti

Bolalar ololmaydigan, yorug‘likdan himoyalangan joyda, 25°C dan yuqori bo‘lmagan haroratda saqlash kerak.

Yaroqlilik muddati

2 yil. Yaroqlilik muddati o‘tgandan so‘ng qo‘llanilmasin.

Dorixonalarda berilish tartibi

Retseptsiz.

Ishlab chiqaruvchi

«ALIANCE FARM» MChJ, O‘zbekiston Respublikasi.

Sotuvchi

«GENIUS PHARM» MChJ, O‘zbekiston Respublikasi. Manzil: Andijon viloyati, Andijon shahri, Sanoat ko‘chasi, 7-uy.